•    SEGUNDO POSTO TAMÉN FOI PARA POVES, CON ENNYA DE VALL, MENTRES QUE O TERCEIRO FOI PARA O ASTURIANO ANTONIO HONRUBIA GONZÁLEZ, CON OSLO W

•    NO TORNEO GALEGO DE SELECCIÓNS DE HORSEBALL RESULTOU VENCEDORA  A SELECCIÓN SUR (6-3) EN FEMININO E A NORTE (5-4) MASCULINO

Silleda, 13 de xuño de 2010.- O xinete ferrolán Joaquín Poves Gil gañou na xornada de onte coa súa egua Jana o Gran Premio do Concurso Nacional de Saltos categoría  unha estrela  celebrado nos I Xogos Ecuestres de Galicia, os cales teñen lugar no marco da 33ª Feira Internacional Semana Verde de Galicia, a cal pecha hoxe as súas portas.

Poves, que se alzou campión cun tempo de 41,66 segundos, conseguiu tamén a segunda posición, neste caso con Ennya de Val e un tempo de 41,78 segundos. O terceiro posto foi para o asturiano Antonio Honrubia González con Oslo W e un tempo de 42,70 segundos.
Nesta proba participaron un total de 16 xinetes con 21 cabalos,  mentres que no conxunto do Concurso fixérono 80 xinetes e 107 cabalos.

Nesta competición, cuxo obxectivo é que o cabalo realice un percorrido con obstáculos variados sen cometer ningún fallo e no que se pon a proba tanto a obediencia do cabalo e as súas aptitudes como atleta como a capacidade  do xinete para axudalo sen interferir no salto, participaron un importante número de xinetes para preparar o campionato de España de Xuvenís e Novos Xinetes.

Horseball
No Torneo Galego de Seleccións de Horseball resulto vencedora a Selección Sur en feminino, cun resultado de 6 a 3, mentres que en masculino a gañadora foi a Selección Norte, cun resultado de 5 a 4. Todos os participantes nesta competición pertencen aos diversos equipos que participan na liga Galega de Hoseball

Os I Xogos Ecuestres de Galicia son pioneiros tanto na Comunidade como en España, xa que é a primeira vez que se reúnen nun evento tantas disciplinas e modalidades hípicas.En salto, doma clásica, raid, andadura galega e horseball (baloncesto a cabalo) acollen competicións oficiais desde o pasado xoves e ata hoxe, mentres que en doma vaqueira e enganche realízanse  exhibicións.