A data do certame e outros aspectos do mesmo decidíronse na primeira reunión para esta convocatoria mantida onte polo seu Comité Organizador no recinto feiral
• PARTICIPARON REPRESENTANTES DE EMPRESAS E COLECTIVOS CON GRAN PESO NO SECTOR FORESTAL
• A FEIRA VOLVERASE A CELEBRAR NUN LUGAR REAL DE TRABALLO, O MONTE E INSTALACIÓNS DO CENTRO DE EXPERIMENTACIÓN AGROFORESTAL DE SERGUDE
Silleda, 29 de abril de 2011.- A Feira Internacional de Galicia organizará a segunda edición do seu monográfico forestal, Galiforest, do 28 al 30 de xuño de 2012. Será novamente no monte e instalacións do Centro de Formación e Experimentación Agroforestal de Sergude, unha ubicación que se repite para revalidar o éxito que supuxo na pasada edición a súa celebración nun lugar real de traballo, un monte con fácil acceso e magníficas infraestructuras que permite demostracións en vivo.
Estas datas foron decididas na primeira reunión do Comité Organizador do certame para esta convocatoria, mantida onte pola tarde nas instalacións do recinto feiral. A ela asistiron representantes de empresas e colectivos de gran peso no ramo forestal, así como a xefa do servizo de Planificación e Coordinación da Dirección Xeral de Montes, Carmen Juliani, quen quixo coa súa presenza amosar o apoio da Dirección Xeral a esta nova edición e formar parte activa da mesma.
Por outra banda, participaron varios membros do equipo técnico da Feira Internacional de Galicia, entre eles a súa directora xeral, Paloma Hidalgo.
No transcurso do encontro tamén se abordaron outros aspectos. Así, analizouse a edición de 2010, a cal arroxou resultados moi positivos en canto a satisfacción de expositores (un 97% manifestou nas enquisas realizadas que participará con seguridade na vindeira edición ou valorará facelo) e de visitantes (un 98% afirmou que viu cumplidos os seus obxectivos e un 92% que volverá en 2012). Ademais revisáronse e aprobáronse as novas incorporacións ao comité e presentouse o proxecto de Galiforest 2012.
Galiforest 2010
A primeira edición deste monográfico (celebrouse do 24 ao 26 de xuño do ano pasado) contou con 100 firmas expositoras de 14 países e máis de 100 demostracións de maquinaria en vivo. Pechou as súas portas cunha importante afluencia de visitantes, todos eles vencellados co sector forestal, e un volume de negocio estimado de 7 millóns de euros.
