15 representantes de importantes colectivos e empresas rexionais e nacionais asistiron ao encontro, presidido polo director xeral de Montes
• O ENCONTRO CENTROUSE NA POSTA EN MARCHA DA COMERCIALIZACIÓN E A PROMOCIÓN DO CERTAME, ASÍ COMO NA PROPOSTA DE ACTIVIDADES
Silleda, 19 de outubro de 2011.- O Comité do II Monográfico Forestal Internacional para o Sur de Europa, Galiforest 2012, reuniuse onte pola tarde nas instalacións do recinto Feira Internacional de Galicia, entidade xestora do evento, para avanzar na organización deste certame, que terá lugar do 28 ao 30 de xuño no monte e instalacións do Centro de Experimentación Agroforestal de Sergude, en Boqueixón.
Á reunión acudiu o director xeral de Montes, Tomás Fernández-Couto Juanas, presidente do Comité Organizador, quen destacou os bos resultados da pasada convocatoria e confirmou que a Consellería “segue a apoiar esta feira e fará todo o posible para que a próxima edición volva ser un éxito”
O director xeral estivo acompañado por 15 representantes de importantes asociacións, entidades e empresas do sector a nivel rexional e nacional, unha participación que reflexa o respaldo dos máximos expoñentes do mundo forestal á Feira Internacional de Galicia na organización deste monográfico profesional celebrado nun lugar real de traballo. Disculparon a súa ausencia varios membros do Comité que non puideron acudir pero que apoian firmemente o certame e están a colaborar activamente na súa organización.
Entre os asistentes estiveron os presidentes da Asociación Profesional Galega de Selvicultores (SILVANUS) e da Asociación Forestal Frouma, así como os secretarios da Asociación Sectorial Forestal Galega e da Confederación Galega de Empresarios da Madeira (CONFEMADERA GALICIA). Tamén quixeron participar na definición de Galiforest 2012 membros doutras entidades, como os directores do Centro de Formación e Experimentación Agroforestal de Sergude, do Centro de Investigación Forestal de Lourizán e da Escola de Capataces de Lourizán, ademais da xerente do Colexio Oficial de Enxeñeiros Técnicos Forestais de Galicia e un representante de Certificación Forestal Paneuropea (PEFC Galicia).
Por outra banda, acudiron á reunión diversos cargos dalgunhas das empresas máis representativas do ramo forestal, como Hitraf, Agroteibe, Severino Rial Botana, Maquinaria Agrícola Cancela, Grupo Villapol e Naturgalia
Por parte da Feira Internacional de Galicia estiveron presentes varios membros da organización, encabezados pola directora, Paloma Hidalgo.
Comercialización, promoción e actividades
Este encontro do Comité Organizador estivo centrado principalmente no inicio do proceso comercializador do monográfico e as accións que xa se están a levar a cabo neste sentido, así como no plan de promoción que está a piques de comezar.
Por outra banda, plantexáronse diversas propostas sobre as actividades que se celebrarán de forma paralela á exposición comercial, as cales se concretarán en vindeiras datas e contarán coa implicación de todos os membros do Comité co obxectivo de conformar un atractivo programa destinado aos profesionais do sector.
+ info:
