SÚMANSE MOITAS OUTRAS PROPOSTAS DOS DIVERSOS SALÓNS DO CERTAME, O CAL SE CELEBRA ATA O DOMINGO NO RECINTO FEIRA INTERNACIONAL DE GALICIA ABANCA
Silleda, 9 de xuño de 2023.- A 45ª Feira Internacional Abanca Semana Verde de Galicia continúa co seu programa, destacando hoxe, entre a súa gran cantidade de propostas, as xornadas, presentacións e showcookings.
En canto ás primeiras, a Fundación Empresa-Universidade Galega organizou tres interesantes conferencias centradas en “Estratexias Innovadoras para a xestión sustentable dos recursos no cultivo da vide”, “Diversificación e mellora da produción de cultivos agroforestais en Galicia” e “Ingredientes alternativos en alimentación animal e estratexias sustentables para a mellora do benestar en gandaría”. Así mesmo, esta mañá a Consellería do Medio Rural presentou a ferramenta informática “Sistemas de xestión de explotacións agrarias (Agro 4.0) – cadernos de explotación”, mentres que un dos expositores participantes na feira presentou persianas que xeran electricidade, ademais dunha solución contra a humidade, a condensación, a fatiga e a alerxia. Xa a última hora da tarde o silledense José Ramón Castro presentará o libro “Feirear”.
En canto aos salóns de alimentación e turismo, hoxe finalizaron os Encontros de Compradores de Salimat Abanca e a Bolsa de Contratación Turística de Turexpo Galicia, os cales acolleron durante o día de onte e a mañá de hoxe máis de 3.500 reunións de negocio con turoperadores e compradores alimentarios orixinarios ou con presenza en 25 países.
Ademais, hoxe destacan a cociña en vivo e as degustacións. Así, na Terraza Salimat celebrouse o showcooking “Azul do noso Mar”, a cargo do chef André Arzúa. Desenvolvéronse tamén diversas Experiencias de Calidade, organizadas pola Axencia Galega da Calidade Alimentaria (Agacal), como “Artesanía alimentaria” ou “Irmáns de leite”; e tamén as catas de produtos do mar de Galicia da Consellería do Mar, entre elas as denominadas “Fresco e Salvaxe” a cargo de Begoña Vázquez, do Restaurante O Regueiro da Cova, ou “Suculento tesouro atlántico”, conducida por Emma Pinal, de Gastrobar O Birrán. E a elas súmanse durante toda a xornada multitude de sesións de expositores.
Outras propostas
Sen embargo, as actividades de hoxe na feira inclúen moitas outras propostas, desde talleres de “Seguridade para actividades no medio natural e habilidades primitivas” ou “Aves Migratorias” ata exposición de aves de cetraría ou a VII Carreira Popular Abanca Semana Verde de Galicia, que pecha hoxe o programa da feira.
